Төлеби аудандық білім бөлімі және аудандық кәсіподақ комитеті ұйымдастыруымен байқау өткізді.
Білім бөлімінің басшысы Аманова Роза Сәрсенбекқызы және аудандық кәсіподақ ұйымының төрағасы Сайлауұлы Раджу облыстық “Үздік педагог” жеңімпазын және “Табысты менеджер – 2020”, “Үздік әдістемелік калейдоскоп-2020” байқауларының жеңімпаздарын құттықтап, сыйлықтармен марапаттады. Осы ұстаздардың шыққан биік белестері басқада ұстаздардың шығармашылық шабытын жігерлендіре түседі.
Аудандық іріктеу кезеңінен жүлделі орын иеленген байқауға қатысушылар облыстық кезеңге жолдама алып, облыстық кезеңде жүлделі орын иеленді.
Түлкібас аудандық білім және ғылым қызметкерлерінің кәсіподақ комитеті Абай атындағы мектеп лицейдің мәжіліс залында барлық карантиндік талаптарды сақтай отырып жаңадан сайланған 27 бастауыш кәсіподақ ұйымы жетекшілерімен Бастауыш кәсіподақ ұйымдарында комитеттің құқықтық қызметін жетілдіру, еңбек заңнамасының сақталуына қоғамдық бақылау жасауды күшейту,қызметкерлердің еңбек құқықтары мен мүдделерін қорғау жұмыстарының жоспарлы жүргізілуі тақырыбында семинар-кеңес өткізілді.
Семинарда аудандық кәсіподақ комитетінің төрағасы Д.Абишев және кеңесші А.Полатбеков жүргізіп отырып, пікір алысып берілген сұрақтарға жауап берді.
Мақтаарал ауданы білім бөлімі мен Мақтаарал аудандық білім және ғылым қызметкерлерінің кәсіподақ комитетінің ұйымдастыруымен «С.Рахымов атындағы №4 жалпы орта мектебі» коммуналдық мемлекеттік мекемесінің акт залында барлық карантиндік талаптарды сақтай отырып, көрермендерсіз «Өнерлі ұстаз – 2020» офлайн байқауы ұйымдастырылып өткізілді. «Өнерлі ұстаз – 2020» байқауына барлық негізгі және жалпы орта мектептердің өнерлі ұстаздары қатысып, өз өнерлерін көрсетті.
Сайыстың қорытындысына сәйкес жақсы жетістікке жетіп, жоғыра ұпай иеленген өнерлі ұстаздарға Мақтаарал аудандық білім және ғылым қызметкерлерінің кәсіподақ комитетінің атынан арнайы алғыс хаттар мен бағалы сыйлықтар табысталды.
«Өнерлі ұстаз – 2020» офлайн байқауы жоғары деңгейде ұйымдастырылып өткізілді.
Түркістан облысының барлық аудан, қалаларында білім бөлімдері мен білім және ғылым қызметкерлері кәсіподағының бірлесе ұйымдастыруымен жылдағы дәстүрі бойынша «Мұғалімдер күні» мерекесі аталып өтілді. Бұл барлық білім беру саласы қызметкерлерінің кәсіби мерекесі. Ұстаздардың еңбегі ерен және өлшеусіз.
«Ұстаздық еткен жалықпас үйретуден балаға» – деп ұлы Абай атап көрсеткендей, ұстаз – жас ұрпақтың санасына енгізетін тәлім–тәрбие мен үлгі–өнегені барлық күш жігерімен ұғындыратын ерекше тұлға. Ұстаздың алдында адамзаттың бәрі бас иеді. Ұстаз болашақ азаматтарды ғана емес, бүкіл болашақ қоғамды қалыптастырады. Тәуелсіз қазақ елінің дамуына үлес қосып келе жатқан ұстаздардың еңбектерін ескере отырып, мереке қарсаңында жас ұрпаққа саналы тәрбие, сапалы білім беруде аянбай еңбек етіп жүрген бір қатар ұстаздарымыз түрлі деңгейдегі төсбелгі, құрмет грамоталары және алғыс хаттармен марапатталды.
Құрметті ұстаздар мен білім саласының ардагерлері!
Түркістан облысы білім және ғылым қызметкерлері кәсіптік одағының атынан Сіздерді «Мұғалімдер күні» кәсіби мерекелеріңізбен шын жүректен құттықтаймын!
Сіздердің мерекелеріңіз елдегі ең қадірлі, ең мерейлі мерекелердің бірі. Мемлекет басшысы Қ.Тоқаевтың айрықша көңіл бөлуі нәтижесінде білім мекемелерін көбейту және олардың материалдық-техникалық базасын заманауи қондырғылармен жабдықтау арқылы білім саласын дамытуға барлық жағдай жасалып келеді. Мұғалімдердің жалақысы бірнеше жылда екі есеге көтерілгелі отыр. «Педагог мәртебесі туралы» Заңы қолданысқа енгізіліп, ұстаздардың беделі мен абыройын арттыру, әр түрлі қосымша жүктемелерді азайту бағытында жұмыстар жүргізілуде.
Облыстық кәсіподақ комитеті әрбір еңбеккерге тиісті еңбек жағдайын жасау, әлеуметтік және экономикалық қорғаудың қажетті деңгейін қамтамасыз ету, еңбек қатынастары мен әлеуметтік әріптестікті дамытуға бағытталған шараларды үздіксіз атқаруда. Оның барлығы білім сапасын арттыруға, кәсіби шеберлікті нығайтуға, мұғалімдердің әлеуметтік мәртебесін жоғарылатуға ықпал ететіні сөзсіз. Мұғалімнен өнеге, білім алып, өмір теңізіне құлаш ұрған кез келген шəкірт ұстазымен мақтанады. «Мектептің жүрегі», «Бала жанының бағбаны»… Иə, бұл мектеп мұғалімі — ұстаздарға арналған теңеулер.
Ұлт ұстазы, қазақтың өткен ғасырдағы руханиятының көшбасшысы Ахмет Байтұрсынұлы: “Мектептің жаны – мұғалім. Мұғалім қандай болса, мектебі Һәм сондай болмақшы, солай болған соң, ең әуелі, мектепке керегі – білімді, педагогикадан хабардар, оқыта білетін мұғалім”- деді. Өзінің ісімен, өзінің сөзімен егемен еліміздің болашағын ойлайтын, тәуелсіздігін қорғайтын білімді ұрпақтың тәлімгері сіздерсіздер! Тәуелсіз мемлекетіміздің басты құндылығы – білімді адам. Тек өз Отанымыздағы білім үрдісімен шектеліп қалмай, әлемдік білім кеңістігіне шығу жолындағы қадамдарыңыздың өзі бәсекелестіктің бағын ашады. “Ұстаз, сенің алдыңда бас июге рұқсат ет!” – деген көпке танымал өлең жолдарында осы бір сөз жанкешті абзал жандарға деген сый мен құрметті білдіреді.
Құрметті ұстаздар! Тамаша мереке – Мұғалімдер күні қарсаңында сүйікті ұстаздарымызды осы бір айтулы оқиғамен шын жүректен құттықтаймын.
Сіздерге зор денсаулық, бақ-береке, жұмыстарыңызға шығармашылық табыстар, ізгі махаббат пен мейірім тілеймін! Шәкірттеріңіз биік шыңдардан көрініп, еңбектеріңіз ақтала берсін.
Бүгін Түркістан облысы әкімдігінің мәжіліс залында дәстүрлі түрде «Мұғалімдер күні» кәсіби мерекесіне орай мерекелік іс-шара болып өтті. Іс-шара ҚР Білім және ғылым министрі А.Аймағанбетовтың онлайн форматта өткізген арнайы құттықтау рәсімімен басталды. Мерекелік жиынды облыс әкімінің орынбасары А.Жетпісбаев құттықтау сөзімен ашып, үздік ұстаздарға «Облысқа сіңірген еңбегі үшін» төсбелгілері, облыс әкімінің «Құрмет грамоталары» мен «Алғыс хаттары», облыстық мәслихаттың «Алғыс хаттары» табыс етіліп, бағалы сыйлықтар қоса берілді. Сондай-ақ, «Үздік сынып жетекші» байқауының жеңімпаздарына 100 000 теңгеден ақшалай сыйлықтар табысталды. Облыстық Адами әлеуетті дамыту басқармасының басшысы Р.Жолаев пен Түркістан облысы білім және ғылым қызметкерлері кәсіптік одағының төрағасы Б.Еркінбек сөз сөйлеп, үздік ұстаздарға және халықаралық байқаулардың жеңімпаздарына бағалы сыйлықтар табыс етті.
16.09.2020 жылы Түркістан облысы, Төлеби ауданында партияішілік іріктеу-праймеризге қатысушылардың ашық дебаты басталды. Сарқырама ауылының мәдениет үйінде праймеризге қатысушы «Nur Otan» партиясының мүшелері өздерінің сайлауалды бағдарламаларын ұсынды. Пікірсайыстар бірнеше кезеңнен тұрып, қатысушылар өзінің сайлауалды бағдарламаларын таныстырып қоймай, әріптестерінің, сондай-ақ көрермендердің сұрақтарына жауап берді. Аталған дебатқа Түркістан облысы білім және ғылым қызметкерлері кәсіподағының төрағасы Б.Еркінбек те қатысты.
Мақтаарал ауданы әкімдігінің және Қазақстанның педагогикалық академиясының ұйымдастыруымен 9 қыркүйек күні «Елбасы сыныптастары мен курстастары Түркістан өлкесінде» атты шығарылымның тұсау кесу рәсімі өткізілді.
Іс-шараны Елбасы Н.Ә.Назарбаевтың сыныптастарымен бірге өткерген балалық шағы туралы бейне фильммен басталып, Елбасы Н.Ә.Назарбаевтың сыныптасы Р.Төлемісованың, Мақтаарал ауданының әкімі Б.Асановтың және Қазақстанның педагогикалық академиясының президенті Ж.Төлтебайдың құттықтау сөздерімен жалғасып, «Елбасы сыныптастары мен курстастары Түркістан өлкесінде» атты шығарылымның тұсау кесу рәсімі салтанатты түрде кесілді.
Іс-шараға Елбасы Н.Ә.Назарбаевтың сыныптасы Р.Төлемісова, Мақтаарал ауданының әкімі Б.Асанов, Мақтаарал ауданы мәслихатының хатшысы Қ.Сәрсекбаев, Мақтаарал аудандық кәсіподақ комитетінің төрағасы А.Жолдасов, Шардара аудандық білім бөлімінің басшысы А.Бердалиева, Қазақстанның педагогикалық академиясының президенті Ж.Төлтебай, Мақтаарал аудандық әжелер алқасының төрайымы Ш.Құрбанбаева қатысты.
«Елбасы сыныптастары мен курстастары Түркістан өлкесінде» атты шығарылымның тұсау кесу рәсімі барысында Мақтаарал аудандық кәсіподақ комитетінің төрағасы А.Жолдасовка «І дәрежелі БІЛІКТІ БАСШЫ» төсбелігici табысталып, марапатталды.
Мақтаарал аудандық білім және ғылым қызметкерлерінің кәсіподақ комитетінің баспасөз қызметі.
Мен Еркінбек Бахыт Сейітжаппарұлы Еліміздегі жетекші саяси күш болып табылатын «Nur Otan» партиясының мүшесі ретінде праймеризге қатыса отырып, Елбасы мен Қазақстан Республикасының президенті Қ-Ж.Тоқаевтың бастамалары мен жолдауларын белсенді түрде жүзеге асырылуына атсалысатынымды, еліміздің гүлденуі, халқымыздың ынтымағы, әл-ауқатының артуы мен тұрмыс-тіршілігінің жақсаруына барынша жұмыс жасап, сайлаушылардың сенімін ақтауды өз міндетім деп білемін. Менің сайлауалды бағдарламам төмендегі негізгі мәселелерден тұрады:
– Білім беру саласын өркендетуге, оның ішінде мұғалімдердің беделін арттыру, оқушылардың білім сапасын арттыруға байланысты мектептердің материалдық-техникалық қамтамасыз етілуі мен интернет желісінің жоғары жылдамдықта жұмыс жасауына қол жеткізу (мультимедиялық лингафон, интерактивті тақталар алу және физика, химия, биология, робототехника кабинеттерін толық жарақтандыру), балаларды мектепке дейінгі білім мен тәрбие берумен 100 пайыз қамтамасыз ету;
– Күрделі жөндеуді қажет ететін мектептерге, сондай-ақ қосымша мектеп құрылыстарына тиісті қаржы бөлінуіне ықпал жасау,
– Пандемия кезеңіне байланысты зардап шегіп отырған шағын және орта бизнес өкілдеріне берілетін субсидияның мақсатты жұмсалуына қоғамдық бақылау жасау;
– Аудан көлемінде шағын және орта бизнеспен айналысатын халық санын қаржылай қолдау және оқыту арқылы олардың үлесін 35-40%-ға дейін көтеруге атсалысу;
– Ауыл әкімдерін әділ түрде сайлауға қол жеткізіп, сол әкімдіктерді қаржыландырудың көлемін арттыруға үлес қосу;
– Экологиялық тұрақтылықты сақтай отырып, табиғаттың қолайлылығын ескере келе туризм саласын жандандыру.
– Мемлекетіміздің әрбір отбасына тұрғын үй қолжетімділігі бағытында жұмыстар жүргізіп, тұрғын үй кезегінде тұрған отбасыларды баспаналы болуына атсалысу;
– Алдағы уақытта елді мекендерді толығымен газдандыру жұмыстарының жүргізілуін тездету;
– Елді мекендерде фельдшерлік-акушерлік пункттерін салу, дәрігерлердің біліктілігін арттыру, медицина мекемелерінің материалды-техникалық базасын нығайту, дәрі-дәрмек қорын жасақтау, көрсетілетін медициналық қызметтің сапасын арттыру арқылы өлім-жітім көрсеткішін барынша азайту;
– Бұқаралық спортты дамыту арқылы ұлт денсаулығын нығайтуға үлес қосу. Ол үшін спорт мектептерінің санын арттырып, тау шаңғысы базасын, жүзу бассейндері мен оқу жаттығу орталықтарын, спорт залдарын, мылтық ату тирлерін, ашық спорт алаңдары мен футбол манеждерін көптеп салу;
– Жолдарды күрделі және орташа жөндеу жұмыстарын сапалы жүргізуге ықпал жасау;
– Жастарды қажетті мамандық түрлеріне бағыттау арқылы қажетті мамандарды ауылға тарту, «Дипломмен ауылға» жобасы бойынша жұмыстарды жандандыру, қосымша оқыту арқылы жастарды толықтай жұмыспен қамтуға ықпал жасау;
– Білім беру ұйымдары жұмыскерлерінің еңбек құқықтарының қорғалуын қамтамасыз етіп отырған кәсіподақ өкілі алдағы уақытта халық қалаулысы ретінде ауданның өзге де саласы жұмыскерлерінің еңбек құқықтарының сақталуына жәрдемдесу;
– Ауылшаруашылығы өнімдерін өндіру бағытында ғылыми тұрғыда жергілікті климатқа сай өнім түрлерін өндіру және олар бойынша селекциялық жұмыстарды жолға қою.
Менің өмірлік ұстанымым – айналаңа қызмет етіп, көмек көрсету. Сіздердің сенімдеріңіз-менің жауапкершілігім. Мақсатым, сол жауапкершілік жүгін арқалап, міндетерімді абыроймен атқара отырып халықтың алғысын алу.
Түркістан қалалық білім және ғылым қызметкерлері кәсіподақ комитетінде кәсіподақ комитетінің жылдық жоспарына сай бастауыш кәсіподақ ұйымы төрағаларының кезекті семинары болды. Семинар жаңа оқу жылының басталуына байланысты ұжымда әлемді шарлаған індет кезіндегі қашықтықтан оқытудың тиімділігін арттыру, ұстаздардың сабақ өту үрдісін игерудің тиімді жолдарын қарастыру мақсатында өтілді. Семинар барысында білім ошақтарында компьютерлік техниканың жеткілікті болуын қамтамасыз ету мәселесі, ғаламтордың талапқа сай қолданылу жағдайы баяндалды. (Семинар бүгінгі талапқа сай маскалық режимде, арақашықтықты сақтап, адам санының аз мөлшерде болуы қамтамасыз етілді). Індеттің алдын алу, сақтық шараларын сақтауда қатаң бақылау қажеттілігі айтылды. Қалалық кәсіподақ комитетіне қарасты мектептерде бірінші сыныптардың ашылуы, оқушылардың денсаулықтарын қамтамасыз етуде залалсыздандыру шараларының мектеп әкімшілігімен бірлесе отырып жүргізу керектігі айтылды. Кәсіподақ белсенділері өзара пікірлесті. Семинар соңы кәсіподақ белсенділерін марапаттаумен аяқталды. Еңбегімен еленген кәсіподақ төрағалары: «№14 жалпы орта мектеп» коммуналдық мемлекеттік мекемесінің бастауыш кәсіподақ ұйымының төрайымы Елбасы Ғалия Медеубекқызы, «№22 жалпы орта мектеп» коммуналдық мемлекеттік мекемесінің бастауыш кәсіподақ ұйымының төрайымы Байдрахманова Шынар Даулетбековна, «Келешек» санаториялық бөбекжай коммуналдық мемлекеттік мекемесінің бастауыш кәсіподақ ұйымының төрайымы Ахмет Майра Өтегенқызы, С.Рахимов атындағы жалпы орта мектебінің бастауыш кәсіподақ ұйымының төрағасы Тажиметов Бахтиёр Оринбасарович, «Р.Исетов атындағы №20 жалпы орта мектеп» коммуналдық мемлекеттік мекемесінің директоры Дүйсебек Нұрбол Әмірханұлы, «№31 бастауыш мектеп – балабақша кешені» мемлекеттік мекемесінің директоры Шауенова Ардак Абибуллаевна, «Жауқазын» бөбекжай – балабақшасы мемлекеттік коммуналдық қазыналық кәсіпорнының меңгерушісі Айтилеуова Гульбира Айдаровна, «Мереке» мемлекеттік коммуналдық қазыналық кәсіпорнының меңгерушісі Кожабаева Жанар Куралбаевналар «Қазақстандық салалық білім және ғылым қызметкерлері кәсіптік одағының Түркістан облыстық ұйымы» Қоғамдық бірлестігінің «Кәсіподаққа еңбегі сіңген қызметкер» төс белгісін Түркістан қалалық білім және ғылым қызметкерлері кәсіподақ комитетінің төрайымы Турманова Диана Абайқызы табыстады.
