Ұстаздарға ноутбук табысталды

2020 жылғы 3 қыркүйек күні Қазақстандық салалық білім және ғылым қызметкерлері кәсіптік одағы Түркістан облыстық ұйымының төрағасы Б.Еркінбек және төраға орынбасары А.Абуовтың қатысуымен ұстаздарға ноутбуктар табысталды. Облыстық кәсіподақ комитетінің төрағасы Б.Еркінбек ноутбук алған ұстаздарды ҚР Конституция күнімен және 1 қыркүйек – Білім күні мерекесімен құттықтап, алдағы жұмыстарына сәттілік тіледі. Елдегі карантин режиміне байланысты қазір білім саласының қызметкерлері онлайн режимде оқытуға мәжбүр болып отыр. Ұстаздарымыз өздеріне артылған үлкен жауапкершілікті сезіне отырып, ешбір қиындыққа қарамай өздерінің білімі, күш-жігерінің арқасында аянбай еңбек етіп жатқаны белгілі. Өкінішке орай онлайн режимде оқыту үшін біраз ұстаздардың мүмкіндігі болмай отырғаны баршамызға аян. Сол себепті, осы жайды ескере отырып, Қазақстандық салалық білім және ғылым қызметкерлері кәсіптік одағы және Түркістан облыстық кәсіподақ ұйымы тарапынан ноутбуктар оқушыларға онлайн режимде білім беруіне жағдай жасау мақсатында көпбалалы және әлеуметтік аз қамтылған  ұстаздарға табысталды. Қазығұрт ауданы №11 санатории типтес мектеп интернаты директорының орынбасары О.Салыбеков және №95 жалпы орта мектебінің кәсіподақ комитетінің төрайымы Г.Курманбекова сөз сөйлеп, кәсіподақ ұйымына өз ризашылықтарын білдірді. Ұстаздардың мұң-мұқтажын ескеріп, олардың құқықтары мен мүдделерін қорғау кәсіподақ ұйымы алдында тұрған басты міндеттердің бірі. Ұстаз мәртебесінің артқаны – бұл кәсіподақ мәртебесінің де жоғары екенін көрсетері сөзсіз.