«Түркістан облысы білім және ғылым қызметкерлерінің жергілікті кәсіптік одағы» Қоғамдық бірлестігі

Түркістан облысы білім және ғылым қызметкерлерінің жергілікті кәсіптік одағының ұйымдастыруымен Мақтаарал ауданының ұстаздары 5-11 шілде аралығында Қырғыз Республикасында орналасқан Ыстық көл демалыс аймағына барып, демалып қайтты.

Жалпы саны 70 ұстазымыздың демалуына негіз болған Облыстық кәсіподақ комитетіне Мақтаарал аудандық кәсіподақ комттеті мен аудан ұстаздарының атынан шынайы алғысымызды білдіреміз

Мақтаарал аудандық кәсіподақ комитетінің баспасөз қызметі.

Түркістан облысы білім және ғылым қызметкерлерінің жергілікті кәсіптік одағының ұйымдастыруымен Сарыағаш ауданының 72 ұстазы 2026 жылғы 28 маусым – 4 шілде аралығында Қырғыз Республикасының інжу-маржаны саналатын Ыстық көл жағалауында демалып, көтеріңкі көңіл-күймен елге оралды.

Тянь-Шань тауларының баурайында орналасқан Ыстық көл – әлемдегі ең ірі әрі ерекше көлдердің бірі. Табиғатының көркемдігі, таза тау ауасы, мөлдір суы мен шипалы климаты бұл өлкені Орталық Азиядағы ең танымал демалыс орындарының қатарына қосады. Осындай тамаша табиғат аясында ұстаздарымыз тынығып, әсерлі сәттерге толы демалыс өткізіп, жаңа оқу жылына тың күш-жігер жинады.

Ұстаздардың сапалы демалысын ұйымдастыруға қолдау көрсеткен Түркістан облысы білім және ғылым қызметкерлерінің жергілікті кәсіптік одағына Сарыағаш аудандық кәсіподақ комитеті мен аудан ұстаздарының атынан шынайы ризашылығымызды білдіреміз

Сарыағаш аудандық кәсіподақ комитетінің баспасөз қызметі.

Бүгін біз саналы ғұмырын білім беру саласына арнап, шәкірт тәрбиелеу жолында талмай еңбек етіп келе жатқан тәжірибелі педагог, білікті маман Атеева Наргиса Нишанбайқызының кәсіби жетістіктерін ерекше мақтанышпен атап өтеміз.

Наргиса Нишанбайқызы 1988 жылдың 30 наурызында Өзбекстан Республикасы Ташкент облысының Шыршық қаласында дүниеге келген. Алғашқы білімін Мұхтар Әуезов атындағы №17 мектепте алып, кейін Қазақстанға қоныс аударып, Ордабасы ауданындағы «Шұбарсу» жалпы орта мектебін тәмамдады. Білімге деген құштарлығы оны Шымкент қаласындағы «Мирас» университетінің «Информатика» мамандығына жетеледі.

Еңбек жолын 2009 жылы Шымкент қаласындағы №65 мектеп-гимназиясында физика кабинетінің лаборанты ретінде бастап, 2015 жылдан бері Ордабасы ауданы Қажымұқан ауылындағы Сыдық Ысмайылов атындағы жалпы білім беретін мектепте информатика пәнінің мұғалімі болып жемісті қызмет атқарып келеді.

Ұстаздық қызметінде Наргиса Нишанбайқызы білім беру жүйесіндегі жаңашылдықтарды тиімді енгізіп, оқушылардың шығармашылық қабілеттерін дамытуға, функционалдық сауаттылығын арттыруға және цифрлық технологияларды меңгеруіне ерекше көңіл бөліп келеді. Оның шәкірттері аудандық, облыстық және республикалық деңгейдегі байқаулар мен олимпиадаларда жүлделі орындарға ие болып, ұстаз еңбегінің жемісін дәлелдеуде.

Педагогикалық шеберлігі мен кәсіби ізденісінің нәтижесінде ол көптеген марапаттар мен құрметке ие болды. Атап айтқанда, республикалық «Үздік педагог – 2023» байқауының Бас жүлдегері атанып, Түркістан облысы Білім басқармасының Құрмет грамотасымен, Ордабасы ауданы әкімінің, аудандық білім бөлімінің және кәсіподақ ұйымының Алғыс хаттарымен марапатталды.

Сонымен қатар, халықаралық және республикалық деңгейдегі конференцияларда спикер ретінде тәжірибесімен бөлісіп, білім беру саласындағы өзекті мәселелерді талқылауға белсенді қатысып келеді. STEM, STEAM, цифрлық технологиялар және зерттеу сабақтары бағытындағы шеберлік сыныптары арқылы әріптестеріне кәсіби қолдау көрсетіп, педагогикалық қауымдастықтың дамуына елеулі үлес қосуда.

Бес баланың ардақты анасы, ұлағатты ұстаз Наргиса Нишанбайқызының қажырлы еңбегі, кәсібіне деген адалдығы мен шығармашылық ізденісі жас ұрпақ тәрбиесіндегі жарқын үлгінің бірі.

Сізге шәкірт жүрегіне жол тапқан ұстаздық жолыңызда толағай табыс, шығармашылық шабыт, зор денсаулық және отбасыңызға амандық тілейміз! Еңбегіңіздің жемісін көріп, білім мен тәрбие жолындағы игі бастамаларыңыз әрдайым биік белестерден көріне берсін!

Ордабасы аудандық кәсіподақ комитетінің баспасөз қызметі.

Сауран ауданының ұстаздары, балабақша тәрбиешілері мен білім саласының ардақты қызметкерлері!

Еліміздің жаңа Конституциясы — әрбір азаматтың, соның ішінде еңбек адамының құқығын қорғаудың жаңа, қуатты құқықтық негізі. Ата Заңымызға енгізілген өзгерістер бізге тек жаңа құқықтар беріп қана қоймайды, сонымен бірге өз құқығымыз бен мүддеміз үшін бірлесе әрекет етуді талап етеді.

Бүгінгі тарихи кезеңде Сауран аудандық білім және ғылым қызметкерлерінің жергілікті

кәсіп одақ комитеті баршаңызды ынтымақ пен бірлікке шақырады! Жаңа заң талаптары аясында біздің комитет әрбір ұстаздың, әрбір қызметкердің еңбегін қорғауды басты міндеті деп біледі.

Біздің басты мақсаттарымыз бен ұстанымдарымыз:

•Әділ еңбек және заң үстемдігі: Жаңа Конституция талаптарына сай, ауданымыздағы әрбір білім беру мекемесінде еңбек заңнамасының қатаң сақталуын бақылаймыз. Мұғалімді негізсіз артық жұмысқа жегуге, оның кәсіби мәртебесіне нұқсан келтіруге жол бермейміз!

•Қауіпсіз әрі қолайлы жағдай: Әрбір адамның жұмыс орны заманауи, қауіпсіз және

нәтижелі жұмыс істеуге қолайлы болуын талап етеміз.

•Әлеуметтік қолдау мен ашықтық: Әріптестеріміздің денсаулығын жақсарту,

шипажайларға жолдамалар бөлу, мұқтаж жандарға материалдық көмек көрсету шараларын ашық, әділ әрі тікелей кәсіподақ мүшелерінің қатысуымен жүзеге асырамыз.

•Жас мамандарға қамқорлық: Ауданның білім беру саласына қадам басқан жас

кадрлардың құқығын қорғап, олардың кәсіби өсуіне толық жағдай жасаймыз.

Ардақты әріптестер, ардақты ұстаздар!

Жаңа Конституция — бұл тек құжат емес, бұл — біздің күнделікті өмірімізді, еңбегімізді

және болашағымызды айқындайтын құрал. Ал кәсіподақ — сіз бен біздің ортақ күшіміз, ортақ дауысымыз!

Өз құқығымызды талап етуде, еңбек ортасын жақсартуда бейжай қалмайық. Біз бірге

болғанда ғана мықтымыз! Тұрыңыз, бірігіңіз, құқығыңызды кәсіподақпен бірге қорғаңыз!

Бірлігіміз бекем, еңбегіміз жемісті болсын!

Сауран аудандық кәсіподақ комитетінің баспасөз қызметі.

Болашаққа қадам: Сауран ауданының кәсіподақ комитеті жасанды интеллектімен бірлескен ауқымды жобаны қолға алады.

Заман ағымына сай цифрлық технологияларды енгізу — бүгінгі күннің басты талабы. Осы орайда, Сауран ауданының кәсіподақ комитеті еңбек қатынастары тарихында алғаш рет Жасанды интеллект (ЖИ) технологиясын қолдана отырып, болашақта бірлескен бірегей цифрлық жобаны іске қосуды жоспарлап отыр.

Бұл жай ғана технологиялық жаңалық емес, бұл — аудандағы әрбір еңбек адамының құқығын қорғауды, оларға көрсетілетін қызметті мүлдем жаңа деңгейге көтеретін ауқымды бағдарлама болмақ.

Бірлескен жобаның негізгі мақсаты не?

Кәсіподақ комитеті мен жасанды интеллектіні әзірлеуші мамандар бірлесіп, болашақта арнайы цифрлық платформа мен автоматтандырылған жүйе жасап шығарады. Бұл жүйе іске қосылғанда кәсіподақ жұмысы қалай өзгереді?

«Бір терезе» принципі бойынша жедел көмек: Болашақта әзірленетін бағдарлама Сауран ауданындағы мұғалімдерге, дәрігерлерге және өзге side сала қызметкерлеріне заңгерлік немесе әлеуметтік сұрақтар бойынша тәулік бойы (24/7) қазақ тілінде құқықтық кеңес бере алады.

Құжаттарды қағазсыз рәсімдеу: Жұмысшылардың өтініштерін қабылдау, шипажайларға жолдама беру, материалдық көмек көрсету мәселелерін ЖИ жүйесі секунд ішінде өңдеп, адам факторынсыз, әділ әрі ашық шешім қабылдауға көмектеседі.

Еңбек дауларының алдын алу: Бағдарлама аудан көлеміндегі мекемелерде еңбек заңнамасының сақталуын, жалақының уақтылы төленуін бақылап, қандай да бір мәселе туындаса, кәсіподақ комитетіне алдын ала хабарлап отырады.

Комитеттің басты ұстанымы

Сауран аудандық кәсіподақ комитеті:

«Біз болашақта іске қосылатын бұл жоба арқылы кәсіподақ жұмысын барынша ашық, қолжетімді және заманауи еткіміз келеді. Сауран ауданы — жаңа мүмкіндіктер аймағы, сондықтан инновациялық технологияларды еңбек адамының игілігіне қызмет еткізу — біздің басты міндетіміз».

Бұл бірлескен жұмыс пен жаңа бағдарлама — Сауран ауданы кәсіподақ комитетінің болашақтағы ең ірі цифрлық жетістігі және еңбек нарығын дамытуға қосатын үлкен үлесі болмақ. Тез арада іске қосылатын бұл жоба туралы алдағы уақытта толық ақпарат жарияланатын болады.

Сауран аудандық кәсіподақ комитетінің баспасөз қызметі.

Тәрбиеге арнаған бар ғұмырын,

Білімменен нұрландырған әр күнін.

Әдіскер боп жол көрсетіп талайға,

Бағындырды биіктердің шың-қырын.

Білім мен тәрбиені өмірінің басты мұратына айналдырған, мектепке дейінгі білім беру саласында ұзақ жылдар бойы жемісті еңбек етіп келе жатқан тәжірибелі әдіскер, білікті маман Бектурганова Райхан Бектыбаевна – бүгінгі жас ұрпақ тәрбиесіне өлшеусіз үлес қосып жүрген ардақты жан.

1968 жылдың 11 қаңтарында Түркістан облысы Ордабасы ауданында дүниеге келген Райхан Бектыбаевна еңбек жолын 1989 жылы тәрбиеші қызметінен бастап, бүгінгі күні бала тәрбиесі мен педагогтердің кәсіби дамуына бағыт-бағдар беріп жүрген жоғары санатты әдіскер ретінде танылып отыр.

36 жылдан астам уақытын мектепке дейінгі тәрбие мен оқыту саласына арнаған ізденімпаз, жаңашыл, шығармашыл әдіскердің 13 жылдан астам уақыт бойы әдіскерлік қызметті абыроймен атқарып келе жатқаны – үлкен тәжірибе мен кәсіби шеберліктің айқын дәлелі.

Ол балабақша тәрбиешілеріне заман талабына сай жаңа технологияларды меңгертіп, әдістемелік көмек көрсетіп, кәсіби бағыт-бағдар беруді басты міндеті санайды. Әрбір педагогтің бойындағы қабілетті байқап, оны шыңдауға күш салады. Оның тәлімгерлігімен көптеген жас мамандар кәсіби жетістікке жетіп, аудандық және облыстық байқауларда жүлделі орындарды иеленді.

Ғылыми-әдістемелік мақалалары республикалық басылымдарда жарияланып, мектепке дейінгі білім беру саласының дамуына арналған еңбектері педагогикалық қауым тарапынан жоғары бағаланды.

Еңбек жолында көптеген марапаттарға ие болды:

Қазақстан Республикасы Оқу-ағарту министрлігінің Алғыс хатының иегері;

Республикалық мектепке дейінгі ұйымның үздік әдіскері байқауының аудандық кезеңінде Бас жүлде иегері;

Облыстық кезеңнің І орын жеңімпазы;

«Үздік әдіскер» аудандық байқауының І орын иегері;

Ордабасы ауданы әкімінің Алғыс хатымен марапатталған;

Ордабасы ауданының 60 жылдық мерекелік медалінің иегері және тағы басқа көптеген марапаттардың иесі.

Райхан Бектыбаевна – тек әдіскер ғана емес, ұжымның рухани тірегі, шығармашылық бастамалардың ұйытқысы, әріптестеріне қолдау көрсетіп жүретін жанашыр әріптес.Кәсіби біліктілігі жоғары, тәжірибесі мол, жаңашыл көзқарасты, шығармашыл әрі ізденімпаз. Оның еңбегі – ұжымның жетістігі, шәкірттерінің болашағы және білім саласының дамуына қосылған зор үлес. Осындай еңбекқор, білімді, парасатты ұстаздар барда мектепке дейінгі білім беру саласының келешегі кемел болары сөзсіз.

Сізге зор денсаулық, отбасылық бақыт, шығармашылық табыс пен кәсіби жетістіктер тілейміз! Еңбегіңіздің жемісін көріп, абыройыңыз асқақтай берсін!

Ордабасы аудандық кәсіподақ комитетінің баспасөз қызметі.

Ордабасы ауданының мақтанышы, жас шахматшы Байділдә Аружан Маратиллақызы халықаралық аренада тағы бір зор жетістікке қол жеткізіп, еліміздің мерейін үстем етті.

Бөржар ауылдық округіне қарасты Қайнар ауылының 11 жастағы тұрғыны Аружан Испанияның Гуардамар қаласында 2026 жылдың 1–13 маусымы аралығында өткен тірек-қимыл аппараты зақымдалған спортшылар арасындағы IPCA шахматтан XXV Әлем чемпионатына қатысып, жоғары шеберлігі мен табандылығын паш етті.

Әлемнің әр түкпірінен келген мықты спортшылар бақ сынаған беделді додада Аружан блиц бағдарламасы бойынша барлық қарсыласынан басым түсіп, Әлем чемпионы атанды. Сонымен қатар рапид бағдарламасында қола жүлдеге ие болса, классикалық шахматтан күміс медаль жеңіп алды. Осылайша жас шахматшы әлем чемпионатынан бір алтын, бір күміс және бір қола медальмен оралды.

Аружанның бұл жеңісі кездейсоқ жетістік емес. Ол бұған дейін де халықаралық жарыстарда жоғары нәтиже көрсетіп, Қырғыз Республикасында өткен Азия чемпионатында топ жарып, Азия чемпионы атанған болатын. Оның қоржынында рапидтен алтын медаль, блицтен екі күміс медаль және классикалық шахматтан екі күміс медаль бар.

Жас чемпионның жетістігінің артында үлкен еңбек пен жүйелі дайындық жатыр. Әкесі әрі жаттықтырушысы Жамангараев Маратилла Байділлаевич Темірлан спорт клубында шахматтан жаттықтырушы болып қызмет атқарады. Шахматшы отбасында тәрбиеленген Аружан бүгінде өз таланты мен табандылығының арқасында биік белестерді бағындыруда.

Сонымен қатар Аружан ауданымыздағы «Дулат» мектебінің 6-сыныбын үздік аяқтаған оқушы. Ол оқу үлгерімі жоғары, тәртіпті, сабырлы, жауапкершілігі мол, білімге құштар әрі өз қатарластарынан ой-өрісімен ерекшеленетін талапты шәкірт ретінде ұстаздарының мақтанышына айналып отыр.

Аружанның әлем чемпионатындағы тарихи жетістігі – тек жеке жеңіс емес, бұл ауданымыздың, өңіріміздің және еліміздің абыройын асқақтатқан үлкен жетістік. Білім мен спортты қатар алып жүрген жас дарынның табандылығы мен еңбекқорлығы өскелең ұрпаққа үлгі болары сөзсіз. Осындай талантты шәкірттеріміздің жетістігі ұстаздар қауымының, ата-ананың және білім беру саласының бірлескен еңбегінің жемісі екендігін көрсетеді.

Ордабасы ауданының мақтанышы атанған Аружанға алдағы жарыстарда да толағай табыстар, жаңа жеңістер мен биік белестер тілейміз!

 

Ордабасы аудандық кәсіподақ комитетінің баспасөз қызметі

Медицина қызметкерлері күніне орай Абай Келес аудандық ауруханасы ШЖҚ МКК-де мерекелік іс-шара ұйымдастырылып, кәсіподақ мүшелері мен сала қызметкерлерінің еңбегі жоғары бағаланды.
Салтанатты жиын барысында халық денсаулығын сақтау ісіне адал қызмет етіп жүрген бірқатар қызметкерлер аурухана басшылығының марапаттарына ие болды.
Сондай-ақ, Білім және ғылым қызметкерлері Келес аудандық кәсіподақ комитетінің төрағасы Н. Артыков пен Абай Келес аудандық ауруханасының бас дәрігері Б. Оспановтың атынан бірлескен Құрмет грамоталары табысталып, үздік қызметкерлер марапатталды.
Мереке иелерін кәсіби мерекелерімен құттықтай отырып, дендеріне саулық, отбасыларына амандық, еңбектеріне табыс пен толағай жетістіктер тілейміз!

Келес аудандық кәсіподақ комитетінің баспасөз қызметі.

Жетісай ауданында білім саласы қызметкерлерінің бір жылдық еңбегі қорытындыланып, үздік ұстаздар мен білім беру ұйымдары марапатталған салтанатты шара өтті. Қарақай ауылдық округіндегі Қ.Сәтпаев атындағы мәдениет үйінде жоғары деңгейде ұйымдастырылған жиынға аудан әкімі Серік Үсенұлы Мамытов пен аудандық мәслихат төрағасы Медет Қасымов, Білім бөлімінің басшысы Толқын Айкенжиева және Жетісай аудандық кәсіподақ комитетінің төрағасы Мұхамеджан Спарханов , мектеп директорлары, бастауыш кәсіподақ төрағалары мен ұстаздар қауымы қатысты.

Салтанатты жиында аудан мектептерінде еңбек етіп жүрген үздік педагогтердің жетістіктері ерекше аталып өтті. Оқушыларын республикалық және халықаралық білім бәйгелеріне дайындап, аудан мерейін асқақтатып жүрген ұстаздарға, білім беру ұйымдарының материалдық-техникалық базасын нығайтуға, оқу-тәрбие процесін жетілдіруге және сапалы білім беруге қосқан үлесі үшін бірқатар мектеп ұжымдарына құрмет көрсетіліп, алғыс хаттар мен арнайы марапаттар табысталды. Атап айтсаң рейтинг нәтижесі бойынша алғашқы ондықтағы мектептерге «Сарағаш» шипажайына 100 пайыздық жеңілдікпен жолдамалар, келесі ондыққа Ыстықкөлге 100 пайыздық жеңілдікпен жолдамалар, үзік деп танылған мектеп және директорларға 100 000 теңгеден, әдіскер және меңгерушілерге 50 000 теңгеден, пәні бойынша үздік атанған ұстазға 40 000 теңгеден қаржылай сый берілді.

Мерекелік шара барысында аудан өнерпаздары мен талантты оқушылар сахна төрінде өнер көрсетіп, көпшілікке көтеріңкі көңіл-күй сыйлады. Әсем ән шырқалып, ұлттық және заманауи билер орындалды. Салтанатты кештің сәнін арттырды.

Ұстаз еңбегін ұлықтаған тағылымды жиын білім саласы қызметкерлерінің мәртебесін арттырып қана қоймай, олардың жаңа оқу жылындағы тың жетістіктерге деген жігерін шыңдай түсті.

 

Жетісай аудандық кәсіподақ комитетінің баспасөз қызметі.