«Түркістан облысы білім және ғылым қызметкерлерінің жергілікті кәсіптік одағы» Қоғамдық бірлестігі

Белсенді оқыту – кәсіподақ жұмысының тиімділігі

2021 жылғы 26 қараша күні  «Түркістан облысы білім және ғылым қызметкерлерінің жергілікті кәсіптік одағы» ҚБ негізгі іс-шаралар жоспарына сәйкес, облыстық кәсіподақ комитетінің әдістемелік кабинетінде бастауыш кәсіподақ ұйымдары төрағаларымен семинар өткізілді.

Семинарға облыстық кәсіподақ комитетіне тікелей қарасты бала-бақшалар мен әдістемелік орталық және балалар мен жасөспірімдер спорт мектептерінің бастауыш кәсіподақ ұйымдарының төрағалары қатысты.

Семинарды облыстық кәсіподақ комитеті төрағасының орынбасары А.Абуов ашып, семинардың бағдарламасымен таныстырды.

Семинарға қатысушы кәсіподақ активіне облыстық кәсіподақ комитетінің еліміз Тәуелсіздігі жылдарындағы қызметі туралы 20 минуттық бейнеролик көрсетілді.

Облыстық кәсіподақ комитетінің маманы Д.Мұхтаров                       Қазақстан Республикасының Президенті Қ-Ж.Тоқаевтың «Халық бірлігі және жүйелі реформалар – ел өркендеуінің берік негізі» атты Қазақстан халқына Жолдауы туралы хабарлама жасады.

Кәсіподақ комитеттері қызметінің негізгі бағыттары. Бастауыш кәсіподақ ұйымдарында іс қағаздарды жүргізу жайлы  облыстық кәсіподақ комитеті төрағасының орынбасары А.Абуов баяндады.

Ұжымдық шарт – ұйымдағы әлеуметтік – еңбек қатынастарын реттейтін құрал. Ұжымдық шарттың мазмұны және оның орындалуын бақылау.     Еңбек шарты. Қызметкерлерді жұмыстан босатуды дұрыс рәсімдеудің жалпы қағидалары. Жұмыс берушінің бастамасы бойынша еңбек шартын тоқтату тәртібі. Саладағы қызметкерлердің еңбек құқықтарының бұзылу деректері және оны ретке келтіру жолдары жайлы облыстық кәсіподақ комитетінің бөлім басшысы – заңгер Ғ.Ақбердиев түсіндірме жасады, сұрақтарға жауап берді.

Семинар қатысушыларына бастауыш кәсіподақ ұйымы жұмысының тиімділігін арттыру мақсатында облыстық кәсіподақ комитеті арнайы әзірлеген методикалық нұсқаулықтар таратылды.

Семинарға қатысушылар өзара тәжірибе алмасып, ұсыныстары мен пікірлерін айтты. Сұрақ-жауаптар өткізілді.

Кәсіподақ оқуын жақсарту мақсатында айтылған ұсыныс, пікірлер облыстық кәсіподақ комитеті тарапынан бақылауға алынды. Семинарға қатысушылар осындай семинарларды алдағы кезде жиірек, озат кәсіподақ ұйымдары негізінде  ұйымдастыруды ұсынды.

Облыстық кәсіподақ комитеті төрағасының орынбасары А.Абуов семинарға қатысушыларды  ҚР Тұңғыш Президенті күнімен және ҚР Тәуелсіздігінің 30 жыл жылдығымен құттықтап, озат кәсіподақ комитеті төрағаларына Құрмет грамоталарын, бағалы сыйлықтарды тапсырды, семинар жұмысын қорытындылады.

Облыстық кәсіподақ комитетінің баспасөз қызметі.

Ақпараттық хабар

2021 жылғы 23 қараша күні  «Түркістан облысы білім және ғылым қызметкерлерінің жергілікті кәсіптік одағы» ҚБ негізгі іс-шаралар жоспарына сәйкес, облыстық кәсіподақ комитетінің әдістемелік кабинетінде бастауыш кәсіподақ ұйымдары жетекшілерімен семинар өткізді

Семинарға университеттер мен колледждер және облыстық кәсіподақ комитетіне тікелей қарасты бастауыш кәсіподақ ұйымдарының төрағалары қатысты.

Семинарды  облыстық кәсіподақ комитетінің төрағасы Б.Еркінбек ашып, семинардың бағдарламасымен таныстырды.

Семинар бағдарламасы:

1.Қазақстан Республикасының Тәуелсіздігі жылдарындағы облыстық кәсіподақ комитетінің қызметі туралы бейнеролик.

2.Қазақстан Республикасының  Президенті Қ-Ж. Тоқаевтың «Халық бірлігі және жүйелі реформалар – ел өркендеуінің берік негізі» атты Қазақстан халқына Жолдауы туралы.

3.Кәсіподақ комитетттері қызметінің негізгі бағыттары. Бастауыш кәсіподақ ұйымдарында іс қағаздарын жүргізу.

4. Ұжымдық шарт – ұйымдағы әлеуметтік – еңбек қатынастарын реттейтін құрал. Ұжымдық шарттың мазмұны және оның орындалуын бақылау. Еңбек шарты. Қызметкерлерді жұмыстан сауатты босатуды жалпы қағидалары. Жұмыс берушінің бастамасы бойынша еңбек шартын тоқтату тәртібі. Саладағы қызметкерлердің еңбек құқықтарының бұзылу деректері және оны ретке келтіру жолдары.

Семинарға қатысушы кәсіподақ активіне облыстық кәсіподақ комитетінің еліміз тәуелсіздігі жылдарындағы қызметі туралы 20 минуттық бейнеролик көрсетілді.

Қазақстан Республикасы Президентінің Қазақстан халқына Жолдауы бойынша облыстық кәсіподақ комитетінің төрағасы Б.Еркінбек хабарлама жасады.

Үшінші мәселе бойынша облыстық кәсіподақ комитеті төрағасының орынбасары А.Абуов, төртінші мәселе бойынша облыстық кәсіподақ комитетінің бөлім басшысы – заңгер Ғ.Ақбердиев түсіндірме жасады, сұрақтарға жауап берді.

Семинарға қатысушылар өзара тәжірибе алмасып, ұсыныстары мен пікірлерін айтты.

Облыстық кәсіподақ комитетінің төрағасы Б.Еркінбек озат кәсіподақ комитеті төрағаларына Құрмет грамоталарын, бағалы сыйлықтарды тапсырды, семинар жұмысын қорытындылады.

Облыстық кәсіподақ комитетінің баспасөз қызметі.

БАСТАУЫШ ҰЙЫМ КӘСІПОДАҚ ТІРЕГІ

12 қараша күні «Түркістан облысы білім және ғылым қызметкерлерінің жергілікті кәсіптік одағы»  Қоғамдық бірлестігінің филиалы- Сауран аудандық білім және ғылым қызметкерлері кәсіподақ комитеті №13 жалпы орта мектебінде комитетке қарасты 42 бастауыш кәсіподақ ұйымының төрағаларымен жиналыс өткізді.  Жиналысты Сауран аудандық білім және ғылым қызметкерлері кәсіподақ комитетнің төрайымы Ф. Рысбекова ашып,  бүгінгі таңда атқарып жатқан және алдағы атқарылатын жұмыс жоспарымен таныстырды. Қазақстан Республикасының Еңбек заңнамасына сәйкес Сауран ауданының «Адами әлеуетті дамыту бөлімі»  мен Сауран аудандық білім және ғылым қызметкерлері кәсіподақ комитеті арасындағы 2021—2023 жылдарға арналған әлеуметтік әріптестік жөніндегі екі жақты КЕЛІСІМ негізінде білім мекемелері ұжымдық шартқа тұру қажеттігі айтылды. Белсенді кәсіподақ төрағалары өз ой пікірлерін,  ұсыныстарын ортаға салып тәжірибе бөлісті,  сұрақтарына жауап алды. Кәсіподақ күші бірлікте,  бірігіп көтерген жүк жеңіл демекші кәсіподақ өз мүшелерінің еңбек құқықтарын қорғауда маңызды рөл атқаруда.  Алдағы уақытта осындай жиналыстар жалғасын табатын болады.

Сауран аудандық білім және ғылым қызметкерлері кәсіподақ комитетінің баспасөз қызметі

«Жас келсе – іске!»

Мұғалім – тәуелсіз мемлекетіміздің болашағын қалап жатқан маман. Өйткені, ел болашағының кілті – бүгінгі жас ұрпақтың қолында. Жас ұрпақтың тағдыры олардың бойына білім мен ізгілік нұрын себуші – ұстаздардың қолында. Мектеп табалдырығын үлкен үмітпен аттап, қызмет жолын енді бастаған жас мамандар арасында олардың өнері мен зеректігін, актерлік шеберлігін, тапқырлығын сынға салу бойынша Жетісай ауданына қарасты «№17 «Түркістан» жалпы орта мектебі» коммуналдық мемлекеттік мекемесінде  «Жас келсе – іске!» атты жас мамандар сайысы өткізілді. Сайысқа жалпы 12 жас маман «Жас қыран» және «Болашақ» командалары болып қатысты. Өз команда мүшелерінің бойындағы өнерлері мен мамандық бойынша қызметтерін таныстырудан бастаған жас мамандар сайыстың барлық кезеңдеріне белсене қатысып, «Өнерліге өріс кең» кезеңінде бірі әуелетіп ән салса, қалғандары мың бұралған би өнерімен көзге түсті. Еркін тақырып бойынша актерлік шеберліктерімен  сыналған жас мамандар сахнада өздерін еркін ұстауымен қатар өз образдарындағы кейіпкерлер бейнесін  керемет ашып, көрермендердің ыстық ықыласына бөленді. «Білікті маман – Ел тірегі» кезеңінде жас мамандарымыз сабақ барысында кездесетін түрлі педагогикалық жағдаяттарды шешу бойынша тапқырлықтарымен танылды. Сайыстың соңғы кезеңінде «Мамандығым – мақтанышым» тақырыбы бойынша қатысушылар үздік сабақ жоспарын қорғай отырып, сабақтарындағы жаңашылдық мен тиімді әдіс тәсілдерімен бөлісті. «Жас келсе – іске!» атты жас мамандар сайысында әділ-қазылар алқасының төрағасы Жетісай ауданы кәсіподақ комитетінің маманы Сәкен  Нұрлыбайұлы жас мамандар сайысының жоғары деңгейде өткізілгенін айта отырып, осындай жоғары дайындықта өткізілген іс – шараны ұйымдастыруға негіз болған мектеп директоры Қалмұрзаев Орынбасар ағайға, мектептің бастауыш кәсіподақ ұйымының төрайымы Ералиева Айжамал және жас мамандар жетекшісі Турашева Айгүл апайға алғысын білдірді. Сәкен Нұрлыбайұлы жас мамандарға кәсіподақ жұмысы туралы кішкене түсініктеме бере отырып, бүгінгі сайыста алған әсерімен бөлісті. Жас мамандар сайысында ерекше көзге түсіп, белсенділікпен танылған ұстаздарды алғыс хаттар мен бағалы сыйлықтармен марапаттады.

Жетісай ауданының адами әлеуетті дамыту бөлімі мен аудандық білім және ғылым қызметкерлерінің кәсіподақ комитетінің ұйымдастыруымен ҚР Тәуелсіздігінің 30 жылдығы аясында Түркістан облысы, Жетісай ауданының адами әлеуетті дамыту бөліміне қарасты білім беру ұйымдарының мұғалімдері арасында спорттың үш түрінен Мұғалімдер спартакиадасы ұйымдастырылды. Жалпы спартакиадаға аудандағы білім беру ұйымдарында жұмыс істеп жүрген бірнеше пән мұғалімдері қамтылды. Бекітілген спартакиада ережесіне сәйкес Жетісай қаласы, кент, ауылдық округтерде орналасқан мектептердің мұғалімдері үш кезеңде спорттың үстел теннисі, футзал, волейбол түрлері бойынша сынға түсті. Бір айға созылған Мұғалімдер спартакиадасына 1368 мұғалім қатысты. Спорттың ойын түрлері бойынша балдық жүйемен ұпай жинап спартакиада жеңімпаздары анықталды.

Спартакиада нәтижесінде үстел теннисінен Н. Төреқұлов атындағы №13 жалпы орта мектебінің командасы І орын, І. Есенберлин атындағы №54 жалпы орта мектебі ІІ орын, Д. Қонаев атындағы №9 IT мектеп-лицей командасы ІІІ орынды иеленді. Сонымен қатар үздік өнер көрсетіп ерекше ойынымен “Үздік ойыншы” номинациясымен Қарашев Ерлан, “Үздік ойыншы” атағымен Ануар Жазира, “Өте шапшаң ойыншы” номинациясымен Анықбаева Айман, “Өте икемді ойыншы” атанған Кайпов Полат сынды ұстаздарымыз .көзге түсті. Спорттың футзал түрінен І орынды Т. Рысқұлов атындағы №20 жалпы орта мектебінің ұстаздары жеңіп алды. ІІ орын Ж. Сауірбаева атындағы №16 жалпы орта мектебі, ІІІ орынға Р. Қошқарбаев атындағы №50 жалпы орта мектебінің командасы тұрақталды. “Үздік қорғаушы” номинациясымен Бейсенбаев Қанат, “Үздік шабуылшы” Сәти Бауыржан, “Үздік қақпашы” Уразбаев Ердаулет және ең “Үздік ойыншы” номинациясымен Күнжігітов Әлібек марапатталды. Волейбол ойыны бойынша Д. Қонаев атындағы №9 IT мектеп-лицей командасы І орын, Б. Момышұлы атындағы №6 мектеп-гимназиясы ІІ орын, №65 “Достық” жалпы орта мектебі ІІІ орынды жеңіп алды. Ойын қорытындысында “Үздік шабуылшы” Датқабаев Жанболат, “Үздік доп ұзатушы” Кенжебек Марат, “Үздік қорғаушы” Джанабеков Асхат және спартакиада барысында ерекше көзге түскен ең “Үздік ойыншы” номинациясымен Асабаев Еламан марапатталды.

Мұғалімдер спартакиадасы қорытындысы бойынша спорттың үш түрінен жалпы командалық есепте

І орынмен Д. Қонаев атындағы №9 IT мектеп-лицейінің ұстаздары жеңімпаз атанды.

ІІ орынды Н. Төреқұлов атындағы №13 жалпы орта мектебінің ұстаздары,

ІІІ орынды Т. Рысқұлов атындағы №20 жалпы орта мектебінің мұғалімдері жеңіп алды.

ӨНЕРДІҢ ҚОС САРДАРЫМЕН КЕЗДЕСУ ӨТТІ

Бүгінде ел болашағы жастардың сапалы білім мен саналы тәрбие алуында мектеп табалдырығының, ұстаздар қауымының алар орыны ерекше. Оларға мектеп қабырғасында тек білім ғана беріп қоймай, адами қасиеттерді бойларына мықтап сіңіру де басты назарда. Ал, адамзаттың барлық жақсы қасиеттерін жас ұрпақтар бойына сіңіруде, олардың қоғамдық көзқарастарының  дұрыс қалыптасуында эстетикалық тәрбиенің маңызы аса зор.

Эстетикалық тәрбиенің ең басты салаларының бірі – музыка, өнер. Жас ұрпақтарға эстетикалық тәрбие беріп, жеке тұлғаның ақыл-ойы мен дене бітімін жетілдіруде, біліктілігі мен ойлау қабілетін дамытуда, оқушыларды халықтық музыка мен ұлттық өнерге баулуда өзінің елеулі үлесін қосып келе жатқан қарашаңырақ білім ұяларының бірі – Жетісай ауданының адами әлеуетті дамыту бөлімінің «М.Шоқай» атындағы жалпы орта мектебі.

Бүгін, яғни, 4 қараша күні Қазақстан Республикасы Тәуелсіздігінің 30 жылдығы аясында «М.Шоқай» атындағы жалпы орта мектебінде «Мырзашөл тұлғалары» атты жас ұрпақтың руханиятқа бет бұруына ықпал ететін ғибратты кездесу болып өтті. Кездесуге дәулеткер күйші, сазгер, «Сырдария» университетінің құрметті профессоры, маестро Бөрі Иса мен айтыскер және жазба ақын, бірнеше әндердің авторы, сазгер Мұқтар Құралов арнайы шақырылды. Әдеби-сазды кеште бір тума өнер иелерінің өмір белестері мен еңбек жолдары өнерге қанат қаққан жас жеткіншектерге таныстырылып, Мырзашөл өлкесінің мәдениеті мен өнері туралы естеліктері, толғаныстары кеңінен сөз болды.

Аталмыш мектептің ән-саз пәнінің мұғалімі Гүлмира Айдарованың жетекшілігімен құрылған «Асыл мұра» домбырашылар ансамблі ұлттық өнердің қос сардарының шығармаларын орындап, көпшілікке көтеріңкі көңіл-күй сыйлады. Іс-шараға жиналған ата-аналар мен ұстаздар ұрпақтар сабақтастығының әсерлі керінісіне куә болды.

Кездесу соңында Жетісай ауданы білім саласы қызметкерлерінің кәсіподақ комитетінің қызметкері С.Бейсенов пен аудандық адами әлеуетті дамыту бөлімінің әдіскері Б.Кеттебеков ардагерлерге сый-сияпат жасап, ұйымдастырушыларға алғыстарын білдірді.

«ТОЛАҒАЙ» спорттық-эстафеталық сайысы өткізілді.

Мақтаарал аудандық адами әлеуетті дамыту бөліміне қарасты «Қ.Сәтбаев атындағы №6 жалпы орта мектебі» коммуналдық мемлекеттік мекемесінің әкімдігі мен бастауыш кәсіподақ ұйымының ұйымдастыруымен, аудандық кәсіподақ комитетінің қолдауымен Қазақстан Республикасының Тәуелсіздігінің 30 жылдық мерекесіне орай «Отыз жылдыққа отыз игі іс» іс-шарасы мен салауатты өмір салтын берік ұстану мақсатында 04 қараша күні «Қ.Сәтбаев атындағы №6 жалпы орта мектебі» коммуналдық мемлекеттік мекемесінің ұстаздарының арасында «Толағай» спорттық-эстафеталық сайысы өткізілді.

Мерекелерге орай ұйымдастырылған «Толағай» спорттық-эстафеталық сайысын «Қ.Сәтбаев атындағы №6 жалпы орта мектебі» коммуналдық мемлекеттік мекемесінің директоры Қ.Досқараевпен Мақтаарал аудандық кәсіподақ комитетінің маманы Е.Жанисов құттықтау сөздерімен ашып, спорттық-эстафеталық сайысына қатысушы барлық ұстаздарға сәттілік тіледі.

Жарысқа қатысушы ұстаздар топтың аты мен ұранын таныстыру, «Жүйрік паравоз» ойыны, «Кенгуру» сайысы, «Баскетбол торына доп лақтыру», «Допты түсірме» ойыны, «Калькулятор» ойыны, «Мергендер» сайысы және арқан тарту сынды сайыстарда өзара бақ сынып, үздіктерді анықтады.

Жарыстың қорытындысына сәйкес барлық кезеңдерде өзгелерден оқ бойы озық шығып, жоғарғы ұпайларға қол жеткеріп, сайыстың жеңімпазы болған, жүлдегері болған командаларға аудандық кәсіподақ комитеті мен мектеп әкімдігі тарапынан дайындалған мадақтама қағаздары мен бағалы сыйлықтар табысталды.

Қазақстан Республикасының Тәуелсіздігінің 30 жылдық мерекесіне орай «Отыз жылдыққа отыз игі іс» іс-шарасы мен салауатты өмір салтын берік ұстану мақсатында ұстаздардың арасында «Толағай» спорттық-эстафеталық сайысының өтуіне ұйытқы болған «Қ.Сәтбаев атындағы №6 жалпы орта мектебі» коммуналдық мемлекеттік мекемесінің директоры Қ.Досқараевқа, бастауыш кәсіподақ ұйымының төрайымы Л.Султановаға аудандық кәсіподақ комитетінің атынан шынайы алғысымызды білдіреміз.

Мақтаарал аудандық кәсіподақ комитетінің баспасөз қызметі.

Төлеби аудандық білім және ғылым қызметкерлерінің кәсіподақ комитеті, аудандық спорт мектебі, №9 Айзере орта мектебі  ұйымдастыруымен  бокстан 2010-2011, 2008-2009 жылы туылған жасөспірімдер арасында бокстан  «Қазақстан Республикасы Тәуелсіздігінің 30 жылдығына және еңбек ардагері Нұрлыбай Кенжебайұлын еске алуға арналған  І-ші облыстық ашық турнирі болып өтті. Турнирге  Жетісай ауданы, Келес ауданы,  Сайрам ауданы,  Шымкент қаласы, Төлеби ауданынан спортшылар  бақтарын сынады.

Жеңіске жеткен және жүлделі орындарға ие болған спортшыларға мақтау қағазы мен аудандық кәсіподақ комитетінің арнайы сыйлықтары табыс етілді.

Сарыағаш  аудандық кәсіподақ комитетінің ұйымдастыруымен    Қазақстан Республикасының Тәуелсіздігінің 30 жылдық мерекесіне орай іс-шарасы аясында 31 қазан күні 8 аймақтан жиналған беру ұйымдарының мұғалімдері мен қызметкерлері арасында “Салауатты ұлт – салауатты ұрпақ” атты ұранымен спорттың волейбол түрінен аудандық жарыс ұйымдастырылып өткізілді. Женимпаз командалар  кубок, диплом, каржылай сыйлыктармен марапатталды.

Түлкібас аудандық білім және ғылым қызметкерлері кәсіподақ комитеті 29 қазан күні  аудандық білім беру  мектептерінің  бастауыш кәсіподақ ұйымдары мүшелерін Түркі елінің рухани астанасы  Түркістан қаласына   рухани  жаңғыруымен  және  мәдени туристік  нысандармен  таныстыру мақсатында іс сапарын   ұйымдастырды.