«Түркістан облысы білім және ғылым қызметкерлерінің жергілікті кәсіптік одағы» Қоғамдық бірлестігі

Түркістан облысы, Ордабасы ауданы, «Төрткүлтөбе» жалпы білім беретін мектебінің математика пәнінің мұғалімі Қамшы Бегайым Серікбайқызы.

Қамшы Бегайым Серікбайқызы 1964 жылы 28 қарашада дүниеге келген. Арыс қаласындағы Ә. Жанкелдин атындағы орта мектепті үздік бітірген. 1982 жылы Шымкент педагогикалық институтының «Физика-математика» факультетіне оқуға түсіп, 1987 жылы «Математика-физика пәнінің мұғалімі» мамандығы бойынша бітіріп шыққан.

Еңбек жолын 1987 жылы бастаған. Еңбек өтілі 38 жыл. Қазіргі таңда Төрткүл аймағындағы «Төрткүлтөбе» жалпы білім беретін мектепте математика пәнінің мұғалімі болып қызмет атқарады.

Шығармашылықпен жұмыс істейтін, шеберлігін үздіксіз жетілдіріп, кәсіби деңгейін арттырып отыратын ұстаз. Бастаған ісін соңына дейін жеткізу, тиянақтылық пен жинақылық, қайсарлық оның бойындағы қасиеттер.

Оқушыларға сапалы білім, саналы тәрбие беру мақсатында талмай еңбек етіп келеді. Оқушылардың математика пәніне деген қызығушылығын арттыра біледі. Мұғалім сабақта оқушылардың ой-өрісін, функционалдық сауаттылығын қалыптастыруда жаңа технологияны пайдалану шеберлігін ұштастырады. Қандай іске болмасын аса жауапкершілікпен қарайтын ұстаздың еңбегі бағаланып, жаңа ғасырдың саналы азаматын тәрбиелеудегі еселі еңбегі үшін облыстық, аудандық білім беру мекемелерінің «Алғыс хаттарымен» марапатталған. Мектепте қоғамдық жұмыстарға белсене араласады, бірлестік жетекшісі қызметін атқарады.

Осы жылдар арасында шәкірттері аймақтық, аудандық, облыстық олимпиадаларға қатысып, жүлделі орындарға ие болған.

Соңғы жылдардағы еңбегін атап өтетін болсақ;

Шәкірті 10-сынып оқушысы Артықбай Алтынай жаратылыстану-математика циклы пәндері бойынша Әл-Фараби атындағы халықаралық олимпиадаға қатысып, ІІІ дәрежелі дипломмен марапатталды (2020 ж).

«Математика оңайлан күрделіге» деген тақырыпта авторлық бағдарламасы жарияланған (2021 ж).

Жаратылыстану-математика бағытындағы пәндер бойынша Республикалық жасөспірімдер олимпиадасының аудандық кезеңінде математика пәні бойынша «Төрткүлтөбе» жалпы орта мектебінің 8 – сынып оқушысы Шобан Меруерт марапатталған (2022 ж).

Мемлекетіміздің рухани әлеуетін нығайту мен білім беру сапасын арттыру саясатын жүзеге асыруда кәсіби жаңашылдығы, үздіксіз ізденімпаздығы және жоғары нәтижелері үшін облыстық «Мақтау қағазымен» марапатталған (2022ж).

Жалпы білім беретін пәндер бойынша Республикалық олимпиаданың екінші (аудандық) кезеңінде математика пәнінен «Төрткүлтөбе» жалпы орта мектебінің 11 – сынып оқушысы Артықбай Алтынай ІІІ дәрежелі дипломмен марапатталды (2022 ж).

2022-2023 оқу жылында жалпы білім беретін пәндер бойынша Республикалық олимпиаданың екінші (аудандық) кезеңінде математика пәнінен 9- сынып оқушысы Шобан Меруерт ІІ дәрежелі дипломмен марапатталды (2023 ж).

Жалпы білім беретін пәндер бойынша Республикалық олимпиаданың екінші (аудандық) кезеңінің жүлдегерін дайындағаны үшін «Алғыс хатпен» марапатталған (2023 ж).

Математика пәнінен «Алтын сақа» олимпиадасының аудандық кезеңінде 6 – сынып оқушысы Нұрлыбай Аружан 2 – орын иеленді (2023 ж).

2023-2024 оқу жылында математика пәнінен 10 – сынып оқушылары арасында өткен «Алтын түлек» Республикалық олимпиадасының өңірлік кезеңінің жеңімпазы Шобан Меруерт 1 – орын иеленді (2023 ж).

Оқушы шығармашылығы үнемі ұстаз, сынып ұжымы тарапынан қолдау тауып отыру керек. Қазақта «Тамыздығын тапсаң, тас та жанады» деген сөз бар. Өйткені, оның мақсаты – әрбір балаға терең білім мен тәрбие беріп ғана қоймай, әр баланың табиғи қасиетін, жеке қасиетін ашып, жеке тұлғаны қалыптастыру.

Алдағы уақытта да ардақты ұстаз Бегайым Серікбайқызына жемісті жеңістер мен шығармашылық табыстар тілейміз.

Ордабасы аудандық кәсіподақ комитетінің баспасөз қызметі.

Расулметов Хамракул Моминжанович № 92 «Ақсу» ЖББМ қазақ тілі мен әдебиеті пәні мұғалімі. Еңбек өтілі 24 жыл. 2001 жылы Шымкент университетін бітірген. Еңбек жолын 2001 жылы осы мектепте қазақ тілі мен әдебиеті пәні мұғалімі ретінде бастап, осы күнге дейін еңбек етуде.

Расулметов Хамрақул Моминжанович білім беру саласындағы білімді маман, оның кәсіби қызметі оқушыларға білім мен тәрбие беруде айқын көрініс табады. Расулметов Хамрақулдың ерекшелігі – оның терең білімі, шыдамдылығы және оқушыларға деген жан-жақты көңіл бөлуі.

Расулметов Хамрақул сабақты қызықты және түсінікті өткізеді, оқу материалдарын тиімді ұсынып, оқушылардың өз бетінше ойлануына, сыни тұрғыдан ойлауына және шығармашылық қабілеттерін дамытуға ықпал етеді. Оның сабақтары интерактивті тәсілдермен, заманауи технологияларды пайдаланумен ерекшеленеді, бұл оқу процесін тартымды және тиімді етеді.

Мұғалімнің қарым-қатынас дағдылары ерекше атап өтіледі. Ол оқушылармен жақсы қарым-қатынас орната алады, олардың жеке қасиеттерін және дарындылықтарын ескере отырып, оқу процесіне жеке түрде көңіл бөледі. Бұл әрбір оқушының жеке өсуіне және өзін-өзі жетілдіруіне ықпал етеді.

Бұдан басқа, Расулметов Хамрақул Моминжанович әріптестері арасында да үлгілі және беделді ұстаз,әрі әріптес ретінде танылған. Ол кәсіби дамуға үнемі көңіл бөліп, заманауи білім беру тенденцияларын қадағалап отырады және оның білім берудегі жаңа тәсілдері өзге мұғалімдер үшін үлгі болып табылады.Жұмыс барысында шәкірттері бірқатар жетістіктерге жеткен. Аудандық пән олипиадаларында, ақын-жазушылар оқулары байқауларында жүлделі орындарға ие болған. 11-А сынып оқушысы Хайтметова Хуснора аудандық пән олимпиадасында жүлделі ІІ- орынға ие болды. Аудандық Абай оқулары байқауында Мирзакаримова Чарос жүлделі ІІ – орынды иеленді. Пән бойынша өткізілетін аудан, облыс көлемінде байқау, сайыс, олимпиадаларға , қашықтық олимпиадаларға бірнеше оқушыларды дайындағаны үшін аудандық білім беру бөлімі,облыстық білім басқармасының грамоталарымен марпатталған

Қорытындылай келе, Х.Расулметовтың еңбегі мен арнаулы қасиеттері білім беру процесіне елеулі үлес қосады. Бұл мұғалімнің жұмысы оқушылардың өмір бойындағы жетістіктеріне және дамуына тікелей әсер етеді. Оның берген білімі мен қолдауы, оқушылардың кәсіби маман ретінде өсуіне және өздерінің мүмкіндіктерін толық пайдалануына көмектеседі.

Расулметов Хамрақул өзінің кәсіби жолында үздіксіз дамып, өзгеріп отырады, бұл оның сабақтарын заман талабына сай етеді. Оның инновациялық көзқарасы және шығармашылы әдістері оқу процесін байыта түседі, оқушыларға өздерінің білімдерін қолдануда жаңа тәсілдерді іздеуге мүмкіндік береді.

Сонымен қатар, Расулметов Хамрақул оқушылар арасында өзара сыйластықты және қолдауды нығайтуға үлес қосады, бұл олардың әлеуметтік дағдыларын дамытуға көмектеседі. Мұғалімнің бұл қасиеттері оны тек үлгілі оқытушы ретінде ғана емес, сонымен қатар оқушылардың сенімді досы және кеңесшісі ретінде де көрсетеді.

2005 жылдан бастап мектептің кәсіподақ комитетінің төрағасы. Кәсіподақтағы еңбек өтілі- 19 жыл. Сайрам ауданының қоғамдық жұмыстарына белсене қатысуда. Мектепте кәсіподақ комитетінің белсенділігін арттыру және кәсіподақ мүшелерінің әлеуметтік –экономикалық құқықтық мүдделерін қорғаудың әсерін дамыту бағытында үлкен үлесін қосып келе жатыр. Мектепте кәсіподақ мүшелеріне консультативтік-құқықтық көмек көрсетеді. Еңбек дауларын алдын алу және болдырмау, еңбек қатынастарына байланысты түсініспеушіліктер, наразылықтар мен арыз-шағымдарды ұжымда шешеді.

Еңбекшілердің әлеуметтік қорғауда атқарған белсенді еңбегі үшін облыстық кәсіподақ комитетінің «Кәсіподаққа еңбегі сіңген қызметкері» белгісімен , облыстық, аудандық кәсіподақ комитетінің Құрмет грамоталарымен марапатталған.

Сайрам аудандық кәсіподақ комитетінің баспасөз қызметі.

2025 жылдың 27-ші қаңтар күні №1 Өнер мектебінің базасында ауданымыздың бірдей мектеп директорлары «Қызылата» жббм директоры Бердіқұлов Балқыбек Балтабайұлы, «Қызылсеңгір» жббм директоры Уразов Мұса Мейрманұлы, П.Тәжібаева атындағы жббм директоры Жолаев Жидебай Шерімұлы ұлықталып, аудандық білім бөлімінің басшысы Абдиев Бахтияр Сапарұлы, Қазығұрт аудандық білім және ғылым қызметкерлері кәсіподақ комитеті төрағасы Анашев Қайрат Убайдуллаұлы құттықтады.

Өмір жолындағы елеулі сәттердің бірі – зейнетке шығу кезеңі. Себебі адам баласы үшін қандай да бір қызметтің, мансап жолының аяқталар тұсы болады. Ал бір салаға талай жылын арнап, сол бір жұмыстың тасын өрге домалату үшін білімі мен еңбегін аямаған жандарға жылы лебіз айту ерекше құрмет болып саналады. Зейнет жасына шыққан мектеп директорларына алдағы кезеңін тек қуанышты сәттермен өткізіңіздер дейміз.

Қазығұрт аудандық кәсіподақ комитетінің баспасөз қызметі.

Түркістан облысы, Ордабасы ауданы, Шұбарсу елді мекені, «Зерде» жалпы білім беретін мектеп» коммуналдық мемлекеттік мекемесінің бастауыш сынып мұғалімі, бастауыш кәсіподақ ұйымының төрағасы Турмаганбетова Сандугаш Оралбаевна.

Бала – яғни ұрпақ Аллах тағаланың адам баласына берген үлкен сыйы. Адам ұрпағымен мың жасайды деген аталы сөз де бар. Бала – ата-ананың көзінің нұры, көңілінің гүлі, өмірінің жалғасы. Себебі ұрпақ тәрбиесі бұл ерекше көңіл бөлетін нәрсе.

Ұлы ұстаз, адал ұстаз. Қазақтың қасиетті сөздерінің ұстазға қосыла айтылуында үлкен мән, терең ой жатқандай. Абай атамыздың қырық бес қара сөзінің бірінде, адамның өн-бойын жүрек басқарады деп келтірсе, мектепті басқарып, әрбір шәкіртінің білім алуына ғұмырын арнап, жетістігіне қуанып, шәкіртті жүлделі болғанда денесіне құмырсқа жүгіргендей махаббатпен мақтана алатын, ұстазды мектептің жүрегі деп атасақ артық дүние болмас. Таудағы арша қандайда бір өмір суынан нәр алып өседі, сондықтан да ол мың жыл өмір сүреді. Сол секілді ұстаз да қаншама шәкірттерге мәңгілік білім суын ішкізген, ішкізе білген адал жан саналмақ.

Турмаганбетова Сандуғаш Оралбайқызы 1979 жылы ұстаздар отбасында дүниеге келді. Отбасындағы асыл тәрбиені бойына сіңіріп өскен Сандуғаштың арманы ұстаз болу еді.

1993 жылы 9-сыныпты бітіріп, өзі қызыққан оқу орнына түсіп, 1997 жылы Өзбекстан Республикасы, Жыззақ қаласындағы мемлекеттік педагогикалық училищесін жақсы оқып, қызыл дипломмен бітірді.

2003 жылы Өзбекстан Республикасы, Жыззақ қаласындағы мемлекеттік педагогикалық ниститутына түсіп 2005 жылы бітірді.

Ата-бабаламыздың дәуірінде шырақ жарығымен білім алып, өмірде тұлға болып қалыптасқан жандар аз емес. Шырақ-бүкіл әлемге жарық сыйлай алмаса да, жарықтың бар екенінен үміт сыйлайды. Шырақ секілді әрбір шәкірт жүрегіне үміт сыйлап, бір жарықпен алған білімнің бүкіл ғұмырын жарқ еткізер қасиетін ұғындыра білген ұстазды, ұлы деп атайтынымыз осыдан болса керек.

Мұғалімге тән ең бірінші қасиет – баланы құрметтеу. Оның адамшылық ар-ожданын, намысын, тұлғасын жасына қарамай сыйлау, құрмет тұту. Бұл мұғалімнің терең дүниетанымы мен үлкен жүрегінен келіп шығады. Турмаганбетова Сандуғаш ұжымдағы әрбір ұстазбен тіл табысып, қолынан келген көмегін аямайтын жанның бірі.

«Мұғалімнің бүкіл мақтанышы-шәкірттерінде, өзі шашқан ұрпақтарының өсіп өнуінде» деп ұлы ғалым Д.И.Мендеелев айтқандай, өзі тәрбиелеген шәкірттерінің жеткен жетістіктерімен ұстаз мамандығын мамандықтардың ең қастерлісі, қадірлісі санайтын Сандугаш Оралбаевна әлі талай дарынның бойындағы талантын ашып, биік шыңдарға жетелейтіні сөзсіз.

Ордабасы аудандық кәсіподақ комитетінің баспасөз қызметі.

Семинарда қаралған мәселелер:

1. Ұжымдық шартты талқылау;

2. Аудандық кәсіподақ комитетінің 2025 жылға арналған жылдық жоспарымен таныстыру;

3. Аудандық кәсіподақ комитетінің және БКҰ 2025 жылғы сметасын бекіу;

4. Еңбек қауіпсіздігі және еңбекті қорғау жөнінде;

5. Түрлі мәселелер;

Семинарды аудандық кәсіподақ ұйымының төрағасы М.Спарханов ашып, БКҰ төрағаларына сәттілік тіледі. Ұжымдақ шарт терең талқыланып, БКҰ төрағалары өз ұсыныстарын айтты.

Аудандық кәсіподақ комитетінің жылдық жоспарымен таныстырылып өтті, БКҰ жылдық сметаларын бас бухгалтер Н.Бектурганова түсіндіріп, смета бекітілді.

Еңбек қауіпсіздігі және еңбекті қорғау жөнінде баяндама оқылды.

Семинар барысында БКҰ төрағаларының жұмыс нәтижелері қаралып РЕСПУБЛИКАЛЫҚ, ОБЛЫСТЫҚ марапаттармен марапатталды.

Түрлі мәселелер бойынша сан түрлі пікірталас өтіп, қойылған мәселелер назарға алынды.

Жетісай аудандық кәсіподақ комитетінің баспасөз қызметі

Жетісай ауданының білім бөлімі мен аудандық кәсіподақ комитетінің ұйымдастыруымен Жетісай аудандық Мәдениет үйінде облыстық олимпиадада оқушылары жүлделі орын алған ұстаздар мен шәкірттері марапатталды. Марапаттау рәсіміне Жетісай ауданының әкімінің орынбасары Серік Пірімбеков, бөлім басшысының міндетін уақытша атқарушы Ш.Адайбеков, аудандық кәсіподақ ұйымының төрағасы М.Спарханов және әдістемелік кабинет меңгерушісі Р.Исаева қатысты. Аламанда шәкірттері оза шапқан 21 ұстазға аудандық кәсіподақ тарапынан Ыстық көлге жолдама , 23 шәкіртіне смартфондар берілді. Шәкірттерін жоғары дәрежеде білім нәрімен сусындатқан ұстаздарға өз алғысымызды білдіре отырып, шығармашылық шабыт тілейміз!

Жетісай аудандық кәсіподақ комитетінің баспасөз қызметі.

Түркістан облысы, Ордабасы ауданы, Қ.Сыпатаев атындағы жалпы білім беретін мектебі география пәнінің мұғалімі Елбасы Айгүл Арыстанбекқызы.

«Мектептің жаны-мұғалім. Мұғалім қандай болса, мектеп сондай болмақшы. Яғни, мұғалім білімді болса, ол мектептен балалар көбірек білім алып шықпақ. Солай болған соң, ең әуелі мектепке керегі – білімді, педагогика, методикадан хабардар, жақсы оқыта білетін мұғалім»-деп Ахмет Байтұрсынов айтқандай бұл мамандық иелерінің білімді болашақ ұрпақ қалыптасуындағы еңбегі ерен.

Осындай керемет ұстаздарымыздың бірі Елбасы Айгүл Арыстанбекқызы, 1983 жылы 27 қаңтарда Түркістан облысы, Бадам елді мекенінде дүниеге келген. 2000 жылы Шымкент қаласындағы Қожа Ахмет Яссауи атындағы Қазақ-түрік университетіне оқуға түсіп, 2004 жылы «Әлем тарихы» пәні мұғалімі мамандығын бойынша тәмамдап шыққан. Еңбек жолын «Шұбар» елді мекеніндегі Әлия Молдағұлова атындағы негізгі мектепте тарих және география пәнінің мұғалімі ретінде бастады. 2011 жылы Шымкент қаласындағы №55 жалпы орта мектебінде іс басқарушы қызметін атқарған, ұйымдастырушылық қабілеті мен жауапкершілігі осы қызметте айқын көрінді. 2013 жылы екінші жоғары оқу орнын аяқтап, география пәнінің мұғалімі мамандығын алды. Сол жылы Қ.Сыпатаев атындағы жалпы орта мектепке география пәнінің мұғалімі болып жұмысқа орналасты.

Ұлы ойшылдардың бірі Әл-Фараби: «Тәрбиесіз берілген білім – адамзаттың қас жауы», – деп атап өткендей, оқушыларды біліммен қатар адамгершілікке, еңбекқорлыққа, отансүйгіштікке баулуды өзінің басты міндетім деп санап, әр оқушының жүрегіне жол тауып, оларды елдің адал азаматы етіп тәрбиелеу, ұстаздық өмірлік ұстанымым деп қабылдап, осы жолда қажырлы еңбек етіп келеді.

Білім саласында оқушылармен жұмыс жасап пән олимпиадаларына және ғылыми жобаларға дайындап, оқушылары жүлделі орындарды иеленген. Педагог бірнеше рет кәсіби біліктілік байқауына қатысты және оқушылары да республика, облыс деңгейлеріндегі олимпиада, ғылыми жұмыс, байқауларға қатысқан.

2016 жыл, Бауыржанұлы Талант ғылыми жобалар байқауынан аудандық кезеңінен І орын, облыстық кезеңінен ІІІ орын.

2021 жыл, Республикалық «Жас ғалым» ғылыми жоба Бас жүлде, Мұсахан Шырын.

2021 жыл, Азамат Мұхаммедәлі аудандық кезеңнен І орын, облыстық пән олимпиадасында ІІІ орын.

2022 жыл, Исмайыл Сағыныш Республикалық «Зерде» балалар шығармашылық байқауының аудандық кезеңінде І орын, облыстық кезеңінде ІІІ орын.

2023 жыл, Сәдібек Ажар пән олимпиадасында аудандық кезеңде ІІ орын.

2023 жыл, Аудандық пән олимпиадасы ІІ орын Азамат Мұхаммедәлі.

2023 жыл, Ғылыми жоба байқауынан аудандық кезеңінен ІІ орын Мұсахан Шырын.

2024 жыл, Сәдібек Ажар пән олимпиадасында аудандық кезеңде ІІ орын.

2024 жыл, Аудандық пән олимпиадасы І орын Азамат Мұхаммедәлі.

2024 жыл, Ғылыми жоба байқауынан аудандық кезеңінен І орын Мұсахан Шырын.

2024 жыл, Ғылыми жоба байқауынан облыстық кезеңінен ІІІ орын Мұсахан Шырын.

Марапаттары:

2021 жыл, КИО олимпиадасы І орын диплом.

2021 жыл, Үздік педагог І орын диплом.

2021 жыл, Алғыс хат» аудандық кезең оқушылардың шығармашылығына үлес қосқаны үшін марапатталды.

2022 жыл, Үздік педагог «Бас жүлде» диплом, медаль.

2022 жыл, «Кемеңгер ұстаз» Републикалық олимпиадасы І орын.

2022 жыл, «Алғыс хат» облыстық кезең оқушылардың шығармашылығына қосқан үлесі үшін марапатталды.

«Мың бала» олимпиадасы «Алғыс хат».

Шындығында мұғалім барлық мамандық иесін тәрбиелейтін, оқытып үйрететін абзал жандар. «Мұғалім мамандығы – барлық мамандықтың анасы» деп қалай дәл тауып айтқан. Ұстаз алдынан тәрбие алмайтын жан жоқ. Ұстаз берген тәрбие әрбір жанның өміріне жол сілтер шамшырақ болары анық.

Ордабасы аудандық кәсіподақ комитетінің баспасөз қызметі.

Сарыағаш аудандық кәсіподақ комитетінің ұйымдастыруымен Сарыағаш аудандық білім бөліміне қарасты жалпы білім беретін мектептер орта білім беретін мектептерінде қызмет істейтін ұлдар, қыздар арасында “Волейбол” ойыны бойынша 21 желтоқсан 2024 жылы аймақтық, 07 қаңтар 2025 жылы күні аудандық “Денсаулық” спартакиадасы болып өтті. Кәсіподақ мүшелерінің арасында салауатты өмір салтын насихаттау, ұжымда ынтымақ пен бірлікті қалыптастыру мақсатында өткізілген ауқымды іс-шара жоғары деңгейде ұйымдастырылып өткізілді.

Спартакиаданың ашылу салтанатында Қазақстан Республикасының Әнұраны орындалып, аудандық кәсіподақ комитетінің төрағасы Е.Тешебаев, Облыстық кәсіподақ комитеті төрағасының кеңесшісі Ә.Тастанбеков, тілек білдіріп, жарысқа қатысушыларға сәттілік тіледі. Қонақтарға және жарысқа қатысушы спортшыларға түскі ас беріліп, әрі қарай топтық ойындар басталды.

Жарысқа 7 аймақтан жеңімпаз болған ұлдар арасында №12 С.Сейфуллин, №69 ЖББМ, , №28 Абылайхан, №17 Алтынсарин, №78 ЖББМ, №74 ЖББМ,

Қыздар арасында №70 С.Байғозиев, №54 ЖББМ, №67 Т.Тәжібаев, №31 Т.Бигелдинов, №53 Ғабдуллин, №5 Ысмайылов, №74 ЖББМ, ұжымдарынан құралған командалар ақтық ойындарда сайысқа түсті. Қызықты да тартысты өткен жарыстың қорытындысы бойынша ұлдар арасында

1-ші орын №49 М.Жұмабаев мектебі 75 мың теңге, Кубок, және аудандық білім бөлімі мен аудандық кәсіподақ комитетінің Дипломы,

2-ші орын №69 ЖББМ, 50 мың теңге, Кубок, және аудандық білім бөлімі мен аудандық кәсіподақ комитетінің Дипломы,

3-ші орын №74 ЖББМ, 40 мың теңге, “Кубок” және аудандық білім бөлімі мен аудандық кәсіподақ комитетінің Дипломымен марапатталды.

Қыздар арасында 1-ші орынды №67 Т.Тәжібаев, 75 мың теңге, кубок, Диплом, 2-ші орын №54 ЖББМ, 50 мың теңге, кубок, Диплом, 3-ші орынды №31 Т.Бигелдинов қыздар командасы иеленіп, 40 мың теңге, кубок, және бірлескен дипломға қол жеткізді.

Беріліп, жақсы ойын көрсеткен қатысушылар “үздік шабуылшы”, “үздік ойыншы” “үздік қорғаушы” “үздік үйлестіруші” номинацияларымен аудандық кәсіподақ комитетінің Алғыс хаттарымен марапатталды. Ақтық ойындарда белсене қатысқан қалған командаларға, бағалы сыйлық ретінде “Шахмат” тақтасы, “Волейбол” доптары табысталды. Спартакиаданың ережесіне сәйкес, жоғары деңгейде төрешілік еткен, 4 төрешіге 5 мың теңгеден қаржы бөлініп аудандық білім бөлімі мен аудандық кәсіподақ комитетінің “Алғыс хаттарымен” марапатталды.

Сарыағаш аудандық кәсіподақ комитетінің баспасөз қызметі.

2024 жылдың желтоқсан айының 27 күні Келес аудандық кәсіподақ комитетінің ұйымдастыруымен Жаңа жылдық мерекелік іс шараға білім беру саласында жоғарғы жетістіктерге қол жеткізген ұлағатты ұстаздар Түркістан облысының білім басқармасының марапатымен №1 «О.Есімов» атындағы жалпы білім беретін мектебінің ұстазы Н.К.Кукебаев, №3 «Ә.Молдағұлова» атындағы жалпы білім беретін мектебінің орыс тілі пән ұстазы Ю.М.Ергешова, №4 «Ж.Баласағұн» атындағы жалпы білім беретін мектебінің қазақ тілі және әдебиет пән мұғалімі А.Б.Койлибаева, №5 жалпы білім беретін мектебінің тарих пән мұғалімі Ж.А.Жиенбаева, №6 «Бастауыш» мектебінің бастауыш сынып мұғалімі А.А.Полатова, №13 «Т.Бигельдинов» атындағы жалпы білім беретін мектебінің қазақ тілі және әдебиет пән мұғалімі А.Д.Жамиевна, №17 «Еркіндік» атындағы бастауыш мектебінің бастауыш сынып мұғалімі К.М.Рахаева, №31 «Ш.Уалиханов» атындағы жалпы білім беретін мектебінің педагог психологі Р.А.Камбарова, №36 «М.Мәметова» атындағы жалпы білім беретін мектебінің информатика пән мұғалімі С.А.Елубаев, сонымен қатар «AMANAT» партиясы Түркістан облыстық филиалының алғыс хатымен №10 «Игілік» атындағы жалпы білім беретін мектебінің ағылшын пән мұғалімі С.Р.Чилтанбаева, №11 «Жолбасшы» атындағы жалпы білім беретін мектебінің ұстазы Б.Б.Кеңесов және Түркістан облысының білім және ғылым қызметкерлерінің жергілікті кәсіптік одағының төрағасы Б.Еркінбектен төс белгілер, Құрмет грамоталар, Алғыс хаттар, және бастауыш кәсіподақ комитетінің “Дау келісім” комиссиялары сертификаттармен Келес ауданы Білім жене ғылым қызметкерлері кәсіподақ комитетінің төрағасы Н.Артыков марапаттады.

Мектептер мен балабақша ұйымдарындағы кәсіподақ мүшелігіндегі Батыр ана ұстаздарымыз, «Алтын алқа» және «Күміс алқалы» көпбалалы аналарымызға әр бала санына қарай және үйде оқитын мектеп оқушыларына Жаңа жылдық сыйлықтар табысталды.

Келес аудандық кәсіподақ комитетінің атынан барлық кәсіподақ мүшелерін Жаңа жыл мерекесімен құттықтай отырып, әр отбасына жаңа бақыт , жаңа табыс пен қуаныштарға бөлене берулеріңізге шын жүректен тілектеспіз. Құрметті әріптестер! Көк байрағы желбіреген, бүгінгідей абыройлы да айбынды, беделді де берекелі, ынтымағы мен бірлігі жарасқан еліміздің ертеңі жолындағы еңбегіміз жана берсін!

Келес аудандық кәсіподақ комитетінің баспасөз қызметі.

Мақтаарал аудандық кәсіподақ комитетінің ұйымдастыруымен мектепке дейінгі білім беру мекемелерінде қызмет атқарып, 2024 жылдың барысында толағай табыстар мен жоғарғы жетістіктерге қол жеткізген кәсіподақ мүшелерін марапаттауға арналған салтанатты шара өткізілді.

Мерекелік іс-шараға Мақтаарал ауданы әкімінің орынбасары Н.Саттаров, аудандық кәсіподақ кмоиетінің төрағасы А.Ниязбеков, аудандық білім бөлімінің бас маманы Б.Пулатова, аудандық мәслихаттың депутаты, С.Айни атындағы жалпы білім беретін мектебінің директоры Ш.Бабаев, атқару комитетінің мүшелері және мектепке дейінгі білім беру мекемелерінде қызмет атқаратын кәсіподақ мүшелері қатысты.

Іс-шара барысында мектепке дейінгі білім беру мекемелерінде қызмет атқаратын кәсіподақ мүшелеріне Түркістан облысы білім және ғылым қызметкерлерінің жергілікті кәсіптік одағының, Мақтаарал ауданы әкімінің, Аманат партиясының Мақтаарал аудандық филиалы төрағасының, аудандық мәслихат төрағасының, аудандық білім бөлімінің, аудандық кәсіподақ комитетінің марапаттары табысталды.

Жылды қорытындылау мақсатында ұйымдастырылған іс-шара концерттік бағдарламамен жалғасын тауып, іс-шараға келген кәсіподақ мүшелері көтеріңкі көңіл күймен тарасты.

2024 жылдың барысында жоғарғы жетістіктерге қол жеткізген барша кәсіподақ мүшелерін аудандық кәсіподақ комитетінің атынан шын жүректен құттықтаймыз!

Марапаттарыңыз құтты болсын!

Мақтаарал аудандық кәсіподақ комитетінің баспасөз қызметі